TUM KISI BHI QISM KE HAALAAT MEIN HO US MEIN TUM PAR ALLAAH KA TAQWAA LAAZIM HAI

 Abu Nu'aym ne apni kitaab Hilyah mein riwaayat kiya hai ke: 'Umar Bin 'Abd Al-'Azeez Rahimahullaah ne apne ek maatahet ko wasiyat ki aur farmaaya: "Tum kisi bhi qism ke haalaat mein ho us mein tum par Allaah ka Taqwaa laazim hai, Beshak Allaah se Taqwaa ikhtiyaar karna sab se mazboot quwwat, peycheedah tareen daao aur (jung ki) bahtareen tayyaari hai aur tum apne dushman ki dushmani se nahin bach sakte agar tumhaare paas Allaah تعالى ki naafarmaaniyaan maujood hai, kyunke mere nazdeek gunaah logon par unke dushman ki chaal se bhi zyaadah khatarnaak hai, jabke hum tou sirf apne dushman se unke gunaahon ki wajah se dushmani karte hain aur unpar fatahyaab hote hain, wagarnah hamaare paas unke muqaable ki koi quwwat nahin, is liye ke hamaari ta'daad unki tarah nahin, na hi hamaare paas unke jaisi taaqat hai, pas hum unpar agar apne amalon se fatahyaab na hue tou hum unpar apni quwwat se bhi ghalbah nahin paa sakte, aur jis qadar tum logon ki dushmani se bachte ho us se zyaadah apne gunaahon se bacho, jaan rakho tum par Allaah ke farishtey muqarrar hain jo tum par muhaafiz hain, tum apne gharon aur raaston mein jo kuch bhi karte ho woh usey jaante hain, pas unse Hayaa karo aur unse achcha ta'lluq nibhaao, unhen Allaah ki naafarmaani se takleef mat pohnchaao, jabke tum khud ko Allaah ke raaste mein bhi samajh rahey ho, ye mat kaho ke hamaare dushman humse burey hain, bhaley hum jitne bhi gunaah karte rahen woh kabhi hum par kaamyaabi haasil nahin kar sakte, pas (yaad rakho ke) kitni hi qaumen aisi hain jinpar unke gunaahon ki wajah se unse bhi burey log unpar musallat kardiye gaye, so Allaah se apne nafs ke khilaaf bhi aise hi madad maango jaise tum us se apne dushman ke khilaaf mein madad maangte ho, hum Allaah se hamaare liye aur tumhaare liye iska sawaal karte hain." أو كما قال رحمه الله